سفينتكم راشية حديدها مصدد. — منرضاوش بالعبودية
نظام فاشل نقولها و نعاود — دك نتفاهمو غير بالشوية
حرية مسجونة و ليعارض مهدد — فكرتونا فالعشرية
معندناش الخلعة راك تخرف — حنا رباتنا الميزيرية
حتى حباسكم قضية ولف — هذي بلادنا و ليها تضحية
هاذ المرة التاريخ ما يتحرف — راهي في يدنا ريشة الحرية
لي نيتو فاسدة يجبد الطرف — معندناش مصلحة شخصية
يد وحدة طريقنا ما تتلف — هذي المجاهدين خلاوها وصية
كلمة الحراك تركع و تخوف — و طيح سيوف و نجوم سمية
و لي عندو سياد يشد المقذف — ميعلمناش الوطنية
كلامي مالقلب منيش نعتب — دك نتكلم بموضوعية
حكاية الكرة شكون لي يغلب — و الأحاسيس الدرامية
الجميلة و الوحش قصة الغرب — هذي سياسة إلهائية
ميلهوناش عمق بلادنا مخرب — و نظام بلا شرعية
الإرادة و العزيمة فيفري قرب — نرفعو الستار على القضية
الكلمة الأخيرة تولي للشعب — الحراك مواجو قوية
شعر دباغي صهيب من سجن الحراش
