(محمد تجاديت) شعر من سجن الحراش
في وقت الشدة كل واحد كيفاش بيها يحس
انا حسيت بيها وردة و نكون الشوك لي فيها يعس
نجرح اليد الماردة والرجل لي حايبة تعفس
باش نخليها صامدة و نخلي أوراقها ماتيبس
نحس بيها كيما الجبل و نكون حجرة محجارو
غير باش الساس يكمل وكل واحد يبني دارو
الميزان يولي يعدل يتنحاو كامل تجارو
كل واحد بطاقتو يعمل حتى الشجر يجيب ثمارو
نحس بيها كيما الطير لي هجرمن عشو خلاوه محروم
رسل برية مع نسمة لبحر خطها كان مفهوم
لكان جات لمواج تهدر تحكي على كل مظلوم
تهيج و مراح تعبر و ترد علينا اللوم
نحس بيها كيما الدار لي تكون واسعة لكامل الناس
كي يكون الضر عند الجار حتى انا داري تتقاس
شبر في ارض لحرار غالي على الذهب ولماس
هكذا قراوني الثوار لي كانو عليها حراس
نحس بيها كيما الشمس لي تقيس الجلد مور الليلة الباردة
ثوب الذل ماراح نلبس هي علمتني هكذا
كي الصقر عليها نحرس مام النظرة تكون معقدة
انا ببلادي هكذا نحس كي تحيا هي الفايدة
